Advertisement
ఎన్నో వేల ఏళ్ల కింద‌టి ప్ర‌జ‌ల నాగ‌రిక‌త‌లు అప్పుడ‌ప్పుడు ప‌లు తవ్వ‌కాల్లో లేదంటే.. స‌ముద్ర గ‌ర్భాల్లో బ‌య‌ట ప‌డుతుండ‌డం స‌హ‌జ‌మే. శ్రీ‌కృష్ణుడి ద్వారకా న‌గ‌రం స‌ముద్రం కింద ఉంద‌ని గ‌తంలో ప‌లు సార్లు వార్త‌లు వ‌చ్చాయి. ఈ క్ర‌మంలోనే శ్రీ‌కృష్ణుడి ద్వారకా న‌గ‌రానికి చెందిన ప‌లు అవశేషాలు ఇవే అని కూడా ఆయా వార్త‌ల్లో కొన్ని వ‌స్తువుల ఫొటోల‌ను మ‌న‌కు చూపించారు. కానీ అవి 100 శాతం శ్రీ‌కృష్ణుడి ద్వారకా న‌గ‌రానికి చెందిన‌వేనా అనే ఓ అనుమానం జ‌నాల్లో ఉంది. అయితే ఇప్పుడు చెప్ప‌బోయేది కూడా అలాంటి ఓ మునిగిపోయిన పురాత‌న న‌గ‌రం గురించే. కానీ ఇది నిజంగా బ‌య‌ట‌ప‌డిన న‌గ‌ర‌మే. ద్వారకా న‌గ‌రంలా కాదు. మ‌రి ఆ న‌గ‌రం ఏమిటో ? అది ఎలా బ‌య‌ట ప‌డిందో ఇప్పుడు తెలుసుకుందామా..!
ఈజిప్టు న‌గ‌రానికి చెందిన తీరంలోని అబు కిర్ స‌ముద్ర ప్రాంతంలో ఫ్రెంచ్ ఆర్కియాల‌జిస్టు ఫ్రాంక్ గొడియో జ‌రిపిన అన్వేష‌ణ‌లో వేల ఏళ్ల కింద‌టి న‌గ‌రం ఒక‌టి బ‌య‌ట‌ప‌డింది. అలెగ్జాండ్రియాకు 6.5 కిలోమీట‌ర్ల దూరంలో పూర్తిగా స‌ముద్రంలో మునిగిపోయిన థోనిస్ హెరాక్లియాన్ అనే న‌గరాన్ని ఫ్రాంక్ బృందం క‌నుగొంది. స‌ముద్రంలో మునిగిపోయిన 64 ఓడ‌లు, 700 లంగ‌ర్లు, బంగారు నాణేలు, 16 అడుగుల ఎత్తున్న ప‌లు ప్ర‌తిమ‌లు అక్క‌డ వారికి ల‌భించాయి. అంతేకాకుండా అప్ప‌టి అమున్-గెరెబ్ అనే టెంపుల్‌కు చెందిన అవశేషాల‌ను కూడా ఆ బృందం క‌నుగొంది. దీంతోపాటు టెంపుల్ వ‌ద్ద జంతువుల‌ను బ‌లిచ్చేందుకు ఉప‌యోగించే ఓ ప్ర‌త్యేకమైన వ‌స్తువును కూడా వారు ఆ అవ‌శేషాల్లో గుర్తించారు.
ఫ్రాంక్ బృందానికి దొరికిన అనేక క‌ళాకృతులు, అవశేషాలు సుమారు 2300 ఏళ్ల నాటివ‌ని గుర్తించారు. హెరాక్లియాన్ న‌గ‌రానికి చెందిన ఓడ‌రేవు ద్వారా అప్ప‌ట్లో ఈజిప్టుకు స‌రుకుల‌ను ర‌వాణా చేసేవార‌ట. ఇక ఆ న‌గ‌రంలో చిన్న చిన్న ద్వీపాలు, ఆయా మ‌తాల‌కు చెందిన ప‌విత్ర స్థ‌లాలు కూడా ఉండేవ‌ట. అయితే అంత‌టి గొప్ప న‌గ‌రం స‌ముద్రం కింద‌కు ఎలా కుంగిపోయిందో మాత్రం ఎవ‌రూ క‌నిపెట్ట‌లేక‌పోయారు. ఏది ఏమైనా.. ఇలా పురాత‌న న‌గ‌రాలు బ‌య‌ట‌ప‌డ‌డం కొత్తేమీ కాక‌పోయినా వాటి ద్వారా మ‌న‌కు అప్ప‌టి ప్ర‌జ‌ల జీవ‌న విధానాలు మాత్రం తెలుస్తాయి. ఇక ఇప్పుడున్న స‌ముద్ర గ‌ర్భాల్లో ఇంకా ఇలాంటి పురాత‌న న‌గ‌రాలు ఎన్ని మునిగి ఉన్నాయో క‌దా..!
Advertisements
