వాట్సాప్‌లో కొత్త‌ ఫీచ‌ర్‌.. 7 రోజుల్లో మెసేజ్ లు వాటంత‌ట అవే డిలేట్!

ప్ర‌ముఖ ఇన్‌స్టంట్ మెసేజింగ్ యాప్ వాట్సాప్ ఎప్ప‌టిక‌ప్పుడు కొత్త కొత్త ఫీచ‌ర్ల‌ను త‌న యూజ‌ర్ల‌కు అందిస్తూనే వ‌స్తోంది. అందులో భాగంగానే త్వ‌ర‌లో మ‌రొక అద్భుత‌మైన ఫీచ‌ర్‌ను ఆ యాప్ అందుబాటులోకి తేనుంది. డిజ‌ప్పియ‌రింగ్ మెసేజెస్ పేరిట ఆ ఫీచ‌ర్ అందుబాటులోకి రానుంది. వాట్సాప్ లో యూజ‌ర్లు పంపుకునే మెసేజ్‌లు 7 రోజుల త‌రువాత వాటంత‌ట అవే మాయ‌మైపోతాయ‌న్న‌మాట‌.

 

వాట్సాప్‌లో రానున్న డిజ‌ప్పియ‌రింగ్ మెసేజెస్ డిఫాల్ట్‌గా డిజేబుల్ అయి ఉంటుంది. దాన్ని ఎనేబుల్ చేసుకుంటేనే ఆ ఫీచ‌ర్‌ను వాడుకోగ‌లం. ఇక వ్య‌క్తిగ‌త చాట్‌ల‌లో యూజ‌ర్ల త‌మ ఇష్టానికి అనుగుణంగా ఈ ఫీచ‌ర్‌ను ఆన్ లేదా ఆఫ్ చేసుకోవ‌చ్చు. కానీ గ్రూప్ చాట్‌ల‌లో డిజ‌ప్పియ‌రింగ్ మెసేజెస్ ఫీచ‌ర్‌ను ఎనేబుల్ చేసే అధికారం కేవ‌లం గ్రూప్ అడ్మిన్ల‌కు మాత్ర‌మే ఉంటుంది.

డిజ‌ప్పియ‌రింగ్ మెసేజెస్ ఫీచ‌ర్ త్వ‌ర‌లోనే ఆండ్రాయిడ్‌, ఐఓఎస్‌, విండోస్ యూజ‌ర్ల‌కు అందుబాటులోకి రానుంది. అయితే ఈ ఫీచ‌ర్‌ను ఎనేబుల్ చేస్తే మెసేజ్ లు 7 రోజుల పాటు అలాగే ఉంటాయి. త‌రువాత అవి వాట్సాప్ నుంచి మాయ‌మైపోతాయి. వాటిని బ్యాక‌ప్ తీసుకుని మ‌ళ్లీ రీస్టోర్ చేసినా అవి ఉండ‌వు. డిలీట్ అయి క‌నిపిస్తాయి. అలాగే 7 రోజుల పాటు మెసేజ్‌ల‌ను ఓపెన్ చేయ‌క‌పోయినా స‌రే ఆ ఫీచ‌ర్ ఆన్‌లో ఉంటే గ‌న‌క 7 రోజుల త‌రువాత ఆ మెసేజ్ లు డిలీట్ అవుతాయి. అయితే నోటిఫికేష‌న్ ప్యానెల్‌లో మెసేజ్‌ల‌ను క్లియ‌ర్ చేయ‌క‌పోతే అవి ఎన్ని రోజులైనా అక్క‌డ మ‌న‌కు అలాగే క‌నిపిస్తాయి.

ఇక మెసేజ్‌ల‌కు రిప్లై ఇస్తే ఆ మెసేజ్‌లు కొటేష‌న్స్‌తో ద‌ర్శ‌న‌మిస్తాయి. 7 రోజుల త‌రువాత ఆ మెసేజ్ లు డిలీట్ అయినా కొటేష‌న్స్ మాత్రం అలాగే ఉంటాయి. అయితే డిజ‌ప్పియ‌రింగ్ ఇమేజ్ లు, వీడియోల‌ను సేవ్ చేసుకునేందుకు మాత్రం ఆప్ష‌న్ ఇస్తారు. దాంతో ఆయా ఫొటోలు, వీడియోల‌ను ఫోన్‌లో స్టోర్ చేసుకోవ‌చ్చు.